जुग जुग जीयो म्हारी लाडलड़ी : विजया और विनोद

जुग जुग जीयो म्हारी लाडलड़ी
#########
थांरी रख्या करे देशाणी ओ राज
जुग जुग जीयो म्हारी लाडलड़ी.

म्हाने सुख आयो जद थे आया
थे तो सिरदयां में धूप सुहाणी ओ राज
जुग जुग जीयो म्हारी लाडलड़ी.

थांरो उणीयारो महाराणी सो
थांने जलम दियो छत्राणी ओ राज
जुग जुग जीयो म्हारी लाडलड़ी.

चटक मटक चोखा चोखा
थांरै नखरां री बात नीराली ओ राज
जुग जुग जीयो म्हारी लाडलड़ी.

थे मूळको जद जग मूळकज्या
थांरी बात घणी मन भायी ओ राज
जुग जुग् जीयो म्हारी लाडलड़ी.

नख शिख तक थे सज्या रहवो
थांरा शौक जबर रजवाड़ी ओ राज
जुग जुग जीयो म्हारी लाडलड़ी.

दिल थांरो काचो कोमळ घणो
ज्यूँ कनक बाई री जाई ओ राज
जुग जुग जीयो म्हारी लाडलड़ी.

(आज हमारी बेटी नीरा का जन्मदिन है ३ नवम्बर, २०१५)

तर्ज़ : घूमर रमबा म्हे जा स्यां ।